Mefail Shkodra, i dyshuari kryesor për vrasjen e trefishtë në Gjilan më 10 gusht 2025, ka pasur pesë raste penale për të cilat Prokuroria Themelore në Gjilan thotë se i ka ngritur katër aktakuza. Sipas Prokurorisë, djemtë e tij, Edonis Shkodra dhe Engjëll Shkodra, të cilët dyshohet se janë përfshirë në vrasjen e trefishtë në Gjilan, nuk kanë pasur asnjë rast penal më pare. Prokuroria e Gjilanit, shprehet se mbetet e përkushtuar në luftimin e kriminalitetit, ndërsa ka inkurajuar qytetarët të bashkëpunojnë për çdo informacion për rastin. Ngjarja e rëndë ndodhi rreth orës 12:32 minuta të kësaj të diele në rrugën “Ibrahim Rugova”. Policia i identifikoi viktimat si Selami dhe Edmond Hasani (babë e bir), ndërsa viktima e tretë në ngjarjen e rëndë u identifikua si Abedin Hoxha dhe dyshohet të jetë dhëndër në familjen Hasani. Sipas mediave në Kosovë, përveç 3 viktimave, autorët, i dyshuari për fajde Mefail Shkodra dhe dy djemtë e tij, janë plagosur nga përplasja me armë.