Në qytetin jugor të Ukrainës, Mariupol, përpjekjet për evakuim të civilëve janë ndalur, pasi Rusia ka rinisur bombardimet në fabrikën e çelikut Azovstal, ku qindra njerëz kanë mbetur të bllokuar, një ditë pasi grupi i parë ka dalë nga bunkerët nëntokësorë. Një zyrtar lokal i Mariupolit, Sergei Orlov, ka thënë për BBC, se negociatat e nivelit të lartë janë duke vazhduar mes Ukrainës, Rusisë dhe organizatave ndërkombëtare për më shumë evakuime. Përpjekjet e kaluara për të hapur korridore të sigurta në këtë qytet, kanë dështuar. Vendnodhja strategjike e Mariupolit – afër Gadishullit të Krimesë – e ka bërë këtë qytet shënjestër të bombardimeve të vazhdueshme ruse, duke e shkatërruar këtë vend që para luftës kishte rreth 400,000 banorë. Aktualisht besohet se rreth 100,000 njerëz janë ende në Mariupol, duke përfshirë rreth 2,000 ushtarë ukrainas që gjenden në kompleksin Azovstal, pjesën e vetme të qytetit që nuk është pushtuar nga rusët. Për luftime është raportuar edhe në qytetin Odesa dhe në lindje të Ukrainës. Këshilli i qytetit të Odesas, ka thënë se një djalosh 15-vjeçar është vrarë si pasojë e sulmeve ruse. Prej kur Rusia ka nisur luftën e paprovokuar më 24 shkurt, trupat e saj kanë dështuar të marrin kontrollin e ndonjë qyteti të madh ukrainas.