Policia njoftoi procedimin penal në gjendje të lirë për avokatin Arbër Qehaj, nën akuzën e kërcënimit të një qytetareje dhe të gazetarëve të Fiks Fare. Avokati kërcënoi qytetaren dhe gazetarët e Fiksit në momentin kur këta të fundit e përballën atë me akuzën e mashtrimit. Fiks Fare u vu në lëvizje pas denoncimit të qytetares, që e akuzonte atë se i ka marrë 500 mijë lekë për të depozituar një padi në gjykatë, por shërbimi i kërkuar nuk është kryer. Gazetarët e Fiksit u përballen me avokatin Qehajaj, i cili për t’i intimiduar i cilësoi si gjobëvënës. “Ju vini gjoba dhe mashtroni”, i tha avokati gazetares, kur kjo e fundit i kërkoi shpjegime për mashtrimin. Ndërsa kërcënimet për qytetaren që e denoncoi avokati i bëri me telefon, duke i thënë se kjo gjë që ajo i ka bërë është e barabartë me vrasjen e vëllait. “Unë e di ku e ka shpinë ai plaku, vjehrri jot dhe do shkoj të kujdesem për të”, thotë avokati.