Disa persona humbën jetën kur një avion i vogël u rrëzua në një lagje të Kalifornisë të enjten, duke shkatërruar një shtëpi dhe duke i vënë flakën më shumë se shjetë makinave. Të paktën 10 shtëpi u goditën nga mbetjet dhe automjetet në të dy anët e një rruge u dogjën kur Cessna 550 u përplas në tokë, duke lëshuar karburant në një pjesë të San Diegos, ku jetojnë kryesisht familje ushtarakësh. Ndihmës Shefi i Departamentit të Zjarrfikësve të San Diegos, Dan Eddy, u tha gazetarëve se një shtëpi ishte dëmtuar rëndë, por se askush në tokë nuk ishte lënduar. "Kur avioni goditi rrugën, ndërsa karburanti i avionit derdhej, ai shkatërroi çdo makinë që ishte në të dy anët e rrugës," tha ai. Avioni kishte gjashtë persona në bord, sipas Administratës Federale të Aviacionit të SHBA-së. Një nga viktimat u identifikua si Dave Shapiro, një agjent muzikor i cili themeloi Sound Talent Group me seli në San Diego. Kompania tha se dy anëtarë të tjerë të stafit që ishin në bordin e avionit kishin vdekur gjithashtu. Departamenti i Policisë së San Diegos tha të enjten pasdite se të paktën dy persona kishin vdekur, por skuadrat e emergjencave që mbërritën në vendngjarje thanë se avioni ishte shkatërruar plotësisht dhe ata prisnin që numri i viktimave të rritej. Ndërkohë, vetë banorët tregojnë se si kishin ndihmuar fqinjët që të shpëtonin nga flakët. Menduam në fillim se ishte një tërmet. Kishte tym dhe flakë kudo – thotë një banore e cila, bashkë me të birin kishin vrapuar të ndihmonin fqinjët të shpëtonin nga shtëpia që ishte përfshirë nga flakët. Hetuesit kanë nisur tani një hetim për të zbardhur cfarë ka ndodhur. Por të dhënat e para tregojnë se aksidenti ndodhi në kushtet e një mjegulle të dendur.