Një avion i forcave ajrore mbretërore të Britanisë së madhe, është ulur këtë javë në aeroportin e Prishtinës. Lajmi është bërë i ditur nga KFOR-i, këtë të premte, i cili në faqen e tij në facebook sqaroi se bëhet fjalë për një avion të tipit A400M Atlas që ka mbërritur në kosovë për një operacion ndihmës për forcat britanike që shërbejnë në vend në kuadër të misionit të KFOR-it. “Avioni A400M është një mjet strategjik shumë funksional, që mund të transportojë ngarkesa të rënda në distanca të konsiderueshme, në lartësi të ndryshme me aftësinë për tu ulur në pista shumë të shkurtra. Forcat ajrore në Gjermani, Francë, Spanjë, Turqi dhe Belgjikë gjithashtu i përdorin avionët A400M, i cili përbën kështu bazën kryesore të transportit ajror të NATO-s”, thuhet në njoftimin e KFOR-it në llogarinë e tyre zyrtare në ‘Facebook’.