Ministria e Jashtme e Finlandës tha të hënën se kishte thirrur ambasadorin e Rusisë në Helsinki lidhur me një shkelje të dyshuar të hapësirës ajrore finlandeze që ndodhi javën e kaluar. Finlanda, një vend anëtar i NATO-s, tha të premten se besonte që dy avionë ushtarakë rusë hynë në hapësirën e saj ajrore pranë brigjeve të Porvoo-s në pjesën jugore të vendit nordik dhe se Roja Kufitare Finlandeze po hetonte incidentin. “Ambasadorit iu tha se Finlanda e merr seriozisht shkeljen e dyshuar territoriale”, tha ministria e jashtme finlandeze në një deklaratë për agjencinë e lajmeve Reuters. Ambasadori kishte lënë të kuptohet se do ta përcillte mesazhin në Moskë, tha ministria pa dhënë më shumë hollësi. Ambasada e Rusisë në Helsinki nuk iu përgjigj menjëherë një kërkese për koment.