Detaje të reja janë zbuluar nga atentati i mbrëmjes së të shtunës në qytetin e shkodrës, ku u plagos me armë zjarri Dedë Planaj, i afërmi i Bardhok Planajt, i njohur ndryshe si “Kumbari” i drogës, i cili u ekzekutua rreth një vit më parë. Sipas të dhënave paraprake por edhe dëshmisë së të plagosurit, ngjarja ka ndodhur pranë një karburanti ku ai punonte në lagjen Dobrac të qytetit verior. Ka qenë ora 22:00 e mbrëmjes kur një person që udhëtonte me motor ka zbritur prej tij dhe nga një distancë prej 3 metrash i ka zbarazur të gjithë karikatorin e pistoletës. 60 vjeçari ka marrë 5 plumba, në këmbë, dorë dhe brinjë, por fatmirësisht asnjë prej tyre nuk i goditi në organet jetësore. Tashmë ai ndodhet në spitalin e Traumës në Tiranë për një trajtim më të specializuar. Pas atentati, autori u largua me motorin e tij drejt Koplikut, një rrugë kjo e cila ka shumë rrugica dhe që mendohet të jetë përdorur prej tij për të humbur gjurmët. Policia po vijon punën për zbardhjen e rrethanave të ngjarjes dhe po heton të shkuarën e të plagosurit. Gjithashtu janë marrë dhe kamerat e sigurisë të karburantit të cilat mund të hedhin më shumë dritë mbi hetimet.