Presidenti serb, Aleksandër Vuçiç vazhdon me deklaratat provokues dhe kundërshtuese në raport me marrëveshjen për normalizim të marrëdhënieve, për të cilën u ra dakord parimisht në Ohër. Në një takim me përfaqësuesit politikë të serbëve nga Kosova në Rashkë, që gjendet në jug të Serbisë, ka deklaruar se duhet të formohet Asociacioni në mënyrë që serbët të kthehen në institucione. Vuçiç ka kërkuar edhe largimin e njësive speciale policore në veri të vendit. Kushtet e Vuçiç i ka përsëritur edhe drejtori i ashtuquajturës zyra për Kosovën në Serbi, Petar Petkoviç. Petkoviç ka thënë se kërkesa për themelimin “e menjëhershëm” të Asociacionit të Komunave të banuara me shumicë serbe dhe kërkesa për tërheqjen “e të gjitha” njësive speciale policore nga veriu i Kosovës do të miratohen edhe në qeverinë serbe. Në lidhje me Asociacionin e Komunave me shumicë serbe, Petar Petkoviç, tha se duhet të bëhet siç e kërkon Beogradi, dhe jo siç e vlerëson Prishtina, përkatësisht pa kompetenca ekzekutive dhe sipas Kushtetutës së Kosovës.