Drejtoria e Përgjithshme e Burgjeve thotë se nuk është njoftuar nga burgu i Durrësit në lidhje me transferimin përkohësisht për në spital të të burgosurit, Altin Ndoci. Nga verifikimet paraprake, drejtoria thotë se rezulton se për shoqërimin e planifikuar, IEVP Durrës nuk ka informuar Drejtorinë e Përgjithshme të Burgjeve dhe Komisariatin e Policisë Durrës, si dhe nuk ka raportuar në Drejtorinë e Përgjithshme të Burgjeve as planifikimin dhe as realizimin e vizitës mjekësore, në kundërshtim me aktet nënligjore në fuqi. Gjithashtu, rezulton se nuk janë respektuar procedurat standarde për shoqërimin e të paraburgosurve dhe të dënuarve. Nisur nga të dhënat paraprake, me urdhër të Drejtorit të Përgjithshëm të Burgjeve është pezulluar i gjithë zinxhiri komandues i burgut të Durrësit, teksa me urdhër të prokurorisë janë arrestuar tetë persona.