U zhvillua këtë të martë faza e tretë e garës për përzgjedhjen e drejtorit të ri të Byrosë Kombëtare të Hetimit. Kjo është faza e radhës, ku shtatë kandidatët e kualifikuar më herët nisën në ambientet e SPAK testimin në arsyetim logjik për 45 minuta dhe ese për rreth 60 minuta. Rregullorja për përcaktimin e procedurave të përzgjedhjes së kandidatit për Drejtor të BKH-së parashikon vlerësimin me 60 pikë për të dy testet, pra 30 pikë për secilin. SPAK njofton se procedura e testeve u zhvillua nën vëzhgimin e anëtarëve të Komisionit të Përzgjedhjes, vëzhguesve ndërkombëtarë dhe stafit teknik mbështetës. Në përfundim të këtyre fazave të para; testit të aftësive fizike, provimit të zgjeruar me shkrim dhe testit për arsyetimin logjik, Komisioni i Përzgjedhjes do të rendisë kandidatët e kualifikuar, të cilët do të vijojnë me fazat e tjera të konkurrimit. Testi i ardhshëm është ai i poligrafit dhe intervistës në panel, i cili ndiqet nga faza e verifikimit të figurës dhe deklarimit të pasurisë nga Komisioni i Verifikimit të Pasurisë dhe Figurës.