Një protestues u arrestua dhe katër të tjerë u proceduan penalisht lidhur me incidentet e ndodhura gjatë protestës së opozitës të zhvilluar para Kryeministrisë. Në pranga përfundoi një 19-vjeçar nga Tirana. Ndërsa u vendosën nën hetim një tjetër banor I kryeqytetit dhe tre protestues të ardhur nga Korça. Sipas uniformave blu, 19-vjeçari dyshohet se hodhi lëndë plasëse artizanale dhe piroteknike së bashku me persona të tjerë ende të paidentifikuar në drejtim të efektivëve, ku si pasojë u plagosën tre policë. Ata u dërguan drejt spitalit ku po marrin ndihmë mjekësore. Pas përfundimit të protestës është këqyrur vendi i ngjarjes, ku janë sekuestruar në cilësinë e provës materiale objekte dhe sende të hedhura në drejtim të punonjësve të Policisë dhe selisë së Kryeministrisë, të cilat janë dërguar për ekspertim të mëtejshëm. Ndërkohë vijon këqyrja e pamjeve filmike për identifikimin e personave të tjerë të përfshirë në këto akte të dhunshme.