Një person i shpallur në kërkim është arrestuar në pikën kufitare të Kakavijës, pas kontrolleve të kryera në këtë doganë. Arbër Shehu, i cili rezulton resident në shtetin grek, tentoi të futej ilegalisht ne territorin shqiptar. Gjatë kontrollit fizik, policia gjeti në çantën e tij në sendet personale, 160 000 euro të fshehura në zarfe, të cilat nuk ishin deklaruar në doganë, siç kërkohet me ligj. Pas verifikimeve të mëtejshme, policia mësoi se ky shtetas ishte shpallur në kërkim nga autoritetet shqiptare, pasi ishte dënuar nga Gjykata e Tiranës me 1 muaj burg për veprën penale të “Vjedhjes”. Në vijim të veprimeve procedurale, 41-vjeçari u ndalua nga strukturat e policisë dhe materiali hetimor u referua në Prokurorinë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme ligjore. Policia Kufitare njofton se në bashkëpunim me ekipet e Frontex ka intensifikuar kontrollet për parandalimin e krimeve ndërkufitare dhe kapjen e shtetasve në kërkim.