Një 28-vjeçar është vënë në pranga në Tiranë, pas denoncimit të një 37-vjeçareje. Sipas kallëzimit, 28-vjeçari përndiqte dhe kanoste në rrjete sociale 37-vjeçaren, veprime të cilat i kishin shkaktuar ankth dhe panik. I riu banues në fshatin Halilaj, Fushë Krujë, u vu në pranga në kuadër të operacionit “Insistimi”, falë bashkëpunimi të specialistëve të Sektorit për Hetimin e Krimeve Kibernetike me shërbimet e Komisariatit të Policisë Krujë. Nga kontrollet në 2 celularët e tij, u gjetën të aktivizuara llogari false, në platformat “Instagram” dhe “TikTok”, nëpërmjet të cilave 28-vjeçari përndiqte dhe kanoste 37-vjeçaren. Policia ka sekuestruar dy celularët si prova materiale, ndërsa materialet procedurale për rastin iu referuan Prokurorisë së Tiranës, për veprime të mëtejshme.