Një ndërhyrje e komisariatit numër 1 të policisë në bashkëpunim me forcat “Shqiponja” kanë parandaluar një akt të rëndë dhune brenda një familjeje në fshatin Kus të Tiranës. Ngjarja është regjistruar mbrëmjen e së martës, rreth orës 23:00, ku bëhet me dije se një 45 vjeçar, ka dhunuar bashkëshorten dhe fëmijët e mitur në banesë. Pas marrjes së informacionit efektivët kanë zhvilluar operacionin e koduar “Forest”. Sapo efektivët janë futur në shtëpi, i dyshuari ka qëlluar me armë zjarri kallashnikov drejt punonjësve të Policisë, por fatmirësisht ata nuk kanë pësuar lëndime. Më pas i dyshuari duke përfituar nga errësira dhe nga terreni, është larguar në drejtim të një zone të pyllëzuar. Shërbimet e Policisë janë vënë në ndjekje të tij dhe pas gati 2 orë kërkimesh në pyll, kanë bërë të mundur neutralizimin dhe arrestimin e tij.