Dy vëllezër u arrestuan nga policia e Tiranës nën dyshimin se shpërndanin lëndë narkotike kanabis dhe kokainë, duke përdor një lavazh që kishin marrë me qira. Donald Ceka alias Salihi dhe Alban Ceka të moshave 30 dhe 38 vjec u vendosën në pranga nga specialistët për hetimin e narkotikëv të komisariatit numër 6. Bashkë me ta u arrestua edhe Mino Zotaj, 30 vjec, i cili sipas policisë, dyshohet se kishte dijeni për aktivitetin e dy vëllezërve dhe nuk i kallëzoi ato. Operacioni i koduar Bashkëpunimi, zbuloi një lavazh në rrugën “Konferenca e Pezës”në të cilën shpërndaheshin lëndë narkotike. Gjatë kontrolleve të ushtruara në këtë ambient, policia gjeti lëndë narkotike të dyshuar kanabis, një sasi kokaine, një armë sportive, një paisje për bllokimin e valëve, 3 aparate celular, 1 peshore elektronike, të cilat u sekuestruan në cilësinë e provës materiale. Tre të arrestuarit do të qëndrojnë në ambientet e paraburgimit deri në momentin që do të dalin përpara gjykatës së Tiranës për vlersimin e kushteve të masës së sigurisë, teksa grupi hetimit po verifikon në rast se ka apo jo persona të tjerë të përfshirë në këtë veprimtari.