Shërbimet e Policisë Kufitare në Aeroportin e Rinasit, në bashkëpunim me Seksionin e Hetimit të Krimit në Komisariatin e Policisë Rinas, kanë goditur një rast të tentativës për kalim të paligjshëm të kufirit me dokumente të falsifikuara. Gjatë kontrollit të detajuar të udhëtarëve në dalje, u konstatuan dy shtetas turq, 29 dhe 21 vjeç, të cilët tentuan të udhëtonin drejt Britanisë së Madhe nëpërmjet itinerarit Tiranë–Luton. Gjatë kontrollit u zbulua se njëri prej tyre paraqiti një pasaportë greke, për të cilën u dyshua se ishte e falsifikuar. Të dy shtetasit u shoqëruan në vijë të dytë për kontroll të imtësishëm. Gjatë kontrollit fizik dhe të bagazheve, Policia u gjeti një kartë identiteti dhe një leje drejtimi greke të dyshuara si të falsifikuara, si dhe konfirmoi se edhe pasaporta greke e paraqitur ishte false. Në përfundim të veprimeve hetimore, dy shtetasit turq u arrestuan në flagrancë për veprat penale “Falsifikimi i letërnjoftimeve, pasaportave ose vizave”, “Falsifikimi i dokumenteve”, të kryera në bashkëpunim, dhe “Dhënie ndihme për kalim të paligjshëm të kufirit”.Materialet procedurale iu referuan Prokurorisë Tiranë për veprime të mëtejshme.