Dy të rinj, të moshës 28 dhe 29 vjeç u arrestuan nga policia e Durrësit në kuadër të një operacioni të koduar ‘Blindi’. Shtetasit me inicialet E.D. dhe E.B, që të dy banues në Durrës u arrestuan pas një informacioni të siguruar në rrugë operative se qarkullonin të armatosur dhe me një automjet të blinduar. Gjatë kontrollit të automjetit, policia ka sekuestruar një armë zjarri pistoletë me krehër me fishekë, një shumë parash, një targë ruse e dyshuar e falsifikuar, si dhe tre telefona celularë. Automjeti i blinduar është gjithashtu sekuestruar si provë materiale. Në përfundim të veprimeve hetimore, ndaj shtetasit me inicialet E.D., u komunikua arresti në flagrancë për veprën penale armëmbajtje pa leje, ndërsa E.B u ndalua për veprën penale “Moskallëzimi i krimit”. Hetimet i kanë kaluar prokurorisë për të zbardhur më tej aktivitetin e dy të rinjve.