Dy persona kanë rënë në prangat e policisë së Fierit, pasi ishin shpallur në kërkim për prodhim dhe shitje narkotikësh. Adis Caka dhe Elton Duraj rezultojnë të dënuar nga Gjykata e Apelit me nga 6 vite burg secili. Kontretisht Adis Caka, 22 vjeç është dënuar nga Gjykata e Apelit e Juridiksionit të Përgjithshëm Tiranë, me 6 vjet burgim, nga të cilat i kanë mbetur për të kryer 1 vit, 11 muaj e 23 ditë, për veprën penale “Prodhimi dhe shitja e narkotikëve”. Sakaq Elton Duraj, 40 vjeç, është dënuar nga Gjykata po me 6 vjet heqje lirie nga të cilat i kanë mbetur për të kryer 1 vit, 2 muaj e 17 ditë, për të njëjtën vepër penale si bashkëpunëtori i tij. Policia njofton se këta shtetas në bashkëpunim me njëri tjetrin, merreshin me përpunimin dhe shitjen e lëndëve narkotike. Operacioni për arrestimin e tyre u realizua nga Sektori për Hetimin e Narkotikëve i Drejtorinë Vendore të Policisë Fier, në zbatim të planit të masave të megaoperacionit ‘Sundimi i ligjit’.