Informacionet në rrugë operative e kanë çuar Policinë në drejtimin e duhur. Hetimet e kryera nga Policia e Durrësit cuan në kryerjen e një operacioni të koduar Mikalimi, nga i cili janë sekuestruar armë zjarri, kallëpe tritoli, granata offensive dhe fitila ndezës. Ndërhyrja e Policisë bëri të mundur arrestimin e poseduesit të këtij arsenali, që do i shiste te grupet kriminale. Specialistët për Hetimin e Krimeve në Komisariatin e Policisë Durrës, në bashkëpunim me strukturat hetimore të Policisë së Durrësit, në vijim të punës për goditjen e paligjshmërisë, kapjen e personave që lëvizin me armë zjarri ose sende të kundraligjshëm dhe rritjen e parametrave të sigurisë në qytet, në bazë të informacioneve të siguruara nga seksioni për Hetimin e Krimeve, organizuan punën dhe finalizuan me sukses këtë operacion. Shërbimet e Policisë, në vëndin e quajtur "Mbikalimi i hekurit", në Sukth, Durrës, kanë ndaluar shtetasin N. K., dhe gjatë kontrollit fizik iu gjetën dhe sekuestruan në cilësinë e provës materiale 16 kallëpe tritol dhe 10 kapsolla detonatore të cilat ky shtetas do i shiste kundrejt fitimit. Kontrollet kanë vijuar në shtëpinë e tij në Kukës, ku u gjetën dhe sekuestruan në cilësinë e provës materiale 1 armë zjarri, disa kallëpe tritoli, 20 granata ofensive dhe 20 ndezësa. Në bashkëpunim me Prokurorinë , Strukturat hetimore të DVP Durrës, po vijojnë punën për zbardhjen e plotë të kësaj veprimtarie kriminale, kapjen dhe arrestimin e personave të tjerë, të përfshirë në këtë veprimtari.