Policia e Kosovës tha se ka konfiskuar armë, municione dhe maska ushtarake gazi në shtëpitë e dy shtetasve kosovarë që u arrestuan për spiunazh të mërkurën në Ferizaj. Prokuroria bëri të ditur se dy shtetasit kosovarë u arrestuan pas një hetimi disamujor dhe se mbi ta rëndojnë dyshimet për veprën penale të spiunazhit. Ata janë ndaluar për 48 orë, me vendim të prokurorit. “Gjatë kontrollit në vendqëndrimet e dy të dyshuarve kosovarë, në cilësinë e provave materiale janë gjetur dhe sekuestruar dokumente të ndryshme, kompjutera, telefona, USB, armë dhe municione, maska ushtarake gazi, etj”, thuhet në raportin e Policisë së Kosovës. Lidhur me këtë rast nuk janë dhënë më shumë detaje. Por, mediat lokale raportuan se personat e arrestuar dyshohet se kanë spiunuar për llogari të agjencisë Serbe të Sigurisë dhe Informacionit, BIA. Në një reagim më vonë të mërkurën, BIA tha se mohon "çdo lidhje me personat e arrestuar në Kosovë".