Autoritetet gjermane kanë ngritur aktakuzë për vrasje dhe tentim vrasje ndaj të dyshuarit për sulmin vdekjeprurës në tregun e Krishtlindjes në qytetin Magdeburg, ku u vranë pesë persona dhe u plagosën 200 të tjerë, njoftoi policia gjermane mëngjesin e së dielës. I dyshuari, ngarkohet me pesë akuza për vrasje, disa akuza për tentim vrasje dhe disa akuza për shkaktimin e lëndimeve të rënda trupore, tha policia. Ai u paraqit para gjykatësit të shtunën në mbrëmje, i cili urdhëroi që ai të dërgohet në paraburgim në pritje të gjyqit. Sipas autoriteteve, i dyshuari i përdori korsitë e lira të emergjencës për ta ngarë veturën me shpejtësi të lartë nëpër tregun e Krishtlindjes të premten, ku i shkeli njerëzit që ishin mbledhur për të festuar. Katër gra të moshës 45, 52, 67 dhe 75-vjeçare, si dhe një djalë nëntëvjeçar, u vranë në sulm. Sulmi shkaktoi tronditje dhe dhimbje jo vetëm në Gjermani, por në të gjithë botën. Hetuesit thonë se i dyshuari veproi i vetëm, pasi tani për tani nuk ka asnjë tregues se ka pasur ndonjë të përfshirë tjetër, sipas gjetjeve të tyre. Autori është një mjek 50-vjeçar nga Arabia Saudite, i njohur si aktivist kritik ndaj Islamit. Ai ka bërë akuza të çuditshme në rrjetet sociale dhe në intervista, duke pretenduar se autoritetet gjermane nuk po bëjnë mjaftueshëm për të luftuar islamizmin. Nuk është ende e qartë çfarë e shtyu atë ta kryejë sulmin, por, pavarësisht natyrës së sulmit, nuk ka asnjë tregues që ai ishte i motivuar nga islami, tha një zyrtar i lartë ligjor. Shefi i Zyrës Federale të Policisë Kriminale, Holger Munch, tha për transmetuesin publik gjerman ZDF të shtunën se nuk është e mundur të thuhet përfundimisht se akti ishte i motivuar politikisht, megjithëse ai e pranoi se i dyshuari mbante qëndrime kundër islamit dhe merrte pjesë në platforma të ekstremit të djathtë. Kryeprokurori publik në Magdeburg, Horst Ëalter Nopens, tha se motivi mund të kishte të bënte me pakënaqësitë e tij për mënyrën se si trajtohen refugjatët nga Arabia Saudite në Gjermani. Munch shtoi se pas marrjes së një paralajmërimi nga Arabia Saudite për këtë person në nëntor 2023, "u hap një hetim në gjermani. Policia në Saksoni-Anhalt kreu gjithashtu hetimet përkatëse", tha ai. "Ai kishte kontakte të ndryshme me autoritetet, bënte fyerje dhe herë pas here kërcënime, por nuk ishte i njohur për akte dhune", tha Munch për të dyshuarin. Burimet e sigurisë saudite thanë se e kishin paralajmëruar Gjermaninë për sulmuesin e dyshuar dhe kishin kërkuar ekstradimin e tij, por Gjermania nuk ishte përgjigjur.