31-vjeçari Gerti Shehu, autor i sulmit fizik të liderit të opozitës, kryedemokratit Sali Berisha, është lënë në burg, pavarësisht kërkesës së tij për masë më të butë. Gerti Shehu mësohet të ketë thënë para zotave të zeza: “dua të iki në shtëpi se jam djalë i vetëm dhe dua të marr ilaçet për mjekim”. Por pavarësisht kësaj kërkese, Gjykata ka vendosur të lërë në fuqi masën e sigurisë ‘Arrest me burg’. Ka qenë mbrojtja e 31-vjeçari që ka kërkuar masë më të butë, me pretendimin që 31-vjeçari të shtrohej në spital psikiatrik, por që nuk është pranuar nga Apeli. “Çështja në apel u shqyrtua mbi bazën e ankimit të bërë nga personi nën hetim G.SH., i cili kërkoi ndryshimin e vendimit caktimin e masës së sigurimit “arrest në shtëpi” ose shtrimin e përkohshëm në një spital psikiatrik”, thuhet në njoftimin e gjykatës, ku në fund ka vendosur të lërë në fuqi vendimin e Shkallës së parë.