Gjykata e Posaçme e Apelit ka lënë në fuqi masën e sigurisë arrest me burg ndaj ish deputetit socialist, Jurgis Çyrbja dhe bashkëpunëtorit të tij, Ahmeta Masha. Çyrbja apeloi masën e sigurisë së vendosur nga gjykata e posaçme e shkallës së parë pas akuzave të ngritura ndaj ish deputetit prej SPAK-ut, për tregtim të sekreteve shtetërore. SPAK thotë se nga përgjimet e aplikacioneve SKY dhe Encrochat rezulton se Jurgis Çyrbja ka shfrytëzuar statusin e deputetit për të siguruar qasje te institucionet e ligjzbatuese ku interesohej mbi statusin e Altin Hajrit. Sipas SPAK, Çyrbja jo vetëm që i ka dhënë informacion të shumëkërkuarit nga drejtësia, Altin Hajri, por dyshohet edhe se e ka strehuar atë në banesën e tij, duke shmangur operacionet policore. Vetë ish deputetit mohoi të ketë përdorur aplikacionet Sky dhe Encrochat dhe të ketë përkrahur Altin Hajrin, që kërkohet për rrëmbimin, vrasjen dhe zhdukjen e trupit të Jan Prengës.