Dy të arrestuarit në operacionin antiterror të ndërmarrë të hënën në fshatin Orosh të Fushë-Arrëzit kanë kyçur gojën duke mos lëshuar asnjë deklaratë para grupit hetimor. 34 vjeçari Erzen Uka dhe 34-vjeçari Julian Cumrraku ndodhen nën masa të rrepta sigurie në paraburgimin e Drejtorisë së Policisë së Shkodrës. Paraditen e së mërkurës, Erzen Uka u shoqërua po nën masa të forta sigurie në urgjencën e spitalit rajonal të Shkodrës për të marrë mjekim në plagën e shkaktuar nga një armë zjarri në këmbë. Hetimet nuk kanë zbardhur ende zyrtarisht si ka mbetur ai i plagosur, por policia mohon që të ketë qëlluar me armë gjatë operacionit për arrestimin e tyre. Ka dyshime se Uka mund të jetë plagosur aksidentalisht nga miku i tij, Julian Cumrraku gjatë dy të shtënave të tyre ndaj policisë. Pas ndërmjetësimit të familjarëve të tyre, të Uka dhe Cumrraku u vetëdorëzuan, teksa nga kontrollet në banesën ku strehoheshin prej të paktën një muaji u gjetën sasi të mëdha armësh dhe një flamur i shtetit islamik, ISIS.