Kryeministri Edi Rama thotë se komisioni i posaçëm antikorrupsion i ngritur në Kuvend do të luajë një rol thelbësor në diskutimet me Bashkimin Europian për grup-kapitujt ‘Themelorët’. Bisedimet do të përqëndrohen te funksionimi i institucioneve demokratike, reforma në administratën publike, gjyqësori dhe të drejtat themelore, drejtësia, liria dhe siguria, kriteret ekonomike, prokurimi publik, statistikat dhe kontrolli financiar. Duke rënditur të gjitha këto fusha diskutimi, kreu i Qeverisë shënjestron kritikët e komisionit të posaçëm antikorrupsion. “Mbase përmbajtja e këtij Grupi-Kapitujsh dhe volumi i detyrave për t’u kryer, do t’ua ndriçojë fillin e arsyes edhe të gjithë atyre që ngritën akuza të paarsyeshme kundër Komisionit”, shkruan kreu i Qeverisë përmes një reagimi në rrjetet sociale. Komisioni i posaçëm antikorrupsion është bojkotuar nga opozita dhe të gjitha institucionet e drejtësisë i kthyen përgjigje negative ftesës për t’u angazhuar me ekspertë brenda grupit të punës së ngritur për thellimin e reformave.