Prokuroria e Durrësit i ka kërkuar Autoritetit Portual Durrës, autoritetet kufitare, policore dhe doganore që të marrin masa lidhur me mbetjet toksike të cilat kanë mbërritur në fillim të kësaj javë në Portin e Durrësit. Përmes një shkrese prokuroria i ka kërkuar këtij institucioni që mbetjet të mbahen në gjendjen që janë pa bërë veprime për hapjen e tyre si dhe të merren masa që të depozitohen në një vend të sigurt sa i përket sigurisë mjedisore, por edhe asaj fizike, nëpërmjet monitorimit të kamerave 24 orë. Kësaj kërkese nuk i është përgjigjur as Autoriteti Portual i Durrësit dhe as institucionet në varësi të Ministrisë së Mjedisit dhe Turizmit, duke mos dhënë një zgjidhje për situatën e krijuar, me justifikimin se porti nuk ka kapacitet për t’i mbajtur në port, pasi ato kërkojnë shumë metra katrorë hapësirë. Nga ana tjetër shkarkimi i tyre shoqërohet me një rrezik të madh për shkak se të dëmeve që mund të shkaktojnë jo vetëm në mjedis, por edhe tek qytetarët.