Bjellorusia mban të dielën zgjedhjet parlamentare, që në mënyrë të dukshme janë të kontrolluara dhe nën masa të larta sigurie në qendrat e votimit, ndërkohë që opozita e vendit ka bërë thirrje të bojkotohen. Zgjedhjet e 25 shkurtit pritet të forcojnë pozitën e liderit autoritar të vendit, Alyaksandr Lukashenko. Vetëm katër parti, të cilat i mbështesin politikat e Lukashenkos, u lejuan të regjistrohen zyrtarisht për të garuar në këto zgjedhje. Dhjetëra partive të tjera nuk iu pranua kërkesa për t’u regjistruar vitin e kaluar. Liderja opozitare bjelloruse, Svyatlanta Tsikhanouskaya, e cila tha se iu vodh fitorja kundër Lukashenkos në zgjedhjet e vitit 2020, i ka përshkruar këto zgjedhje si “farsë” dhe ka bërë thirrje për bojkotimin e tyre. “Nuk ka njerëz në fletëvotime të cilët do të ofronin ndryshime të vërteta, sepse regjimi i ka lejuar vetëm kukullat e përshtatshme për të, të marrin pjesë në zgjedhje”, tha Tsikhanouskaya në një video nga Lituania, ku ajo po qëndron në azil që pas shuarjes brutale të protestave që nisën kundër rezultatit të zgjedhjeve më 2020. Kjo është hera e parë që mbahen zgjedhjet e përgjithshme në Bjellorusi prej zgjedhjeve presidenciale të vitit 2020, kur Lukashenko mori mandatin e gjashtë. Më shumë se 35.000 njerëz ishin arrestuar gjatë protestave masive disamujore, të cilat u nxitën nga zgjedhjet kontroverse.