Pavarësisht thirrjeve të ndërkombëtarëve për koordinim më të mirë me ta dhe ndalim të hapave të njëanshëm nga Kosova, Kurti ka marrë një tjetër veprim në veri të vendit. Autoritetet kosovare kanë mbyllur të premten pesë institucioneve paralele serbe në veri të vendit – pjesë e banuar me shumicë serbe. Lajmi është bërë I ditur nga ministri i Administrimit të Pushtetit Lokal të Kosovës, Elbert Krasniqi. Ai tha se institucionet paralele serbe kanë funksionuar nën udhëheqjen e Serbisë, duke e "cenuar kushtetutshmërinë dhe ligjet e Republikës së Kosovës”. “Institucionet e Republikës së Kosovës ofrojnë shërbime për të gjithë qytetarët, pa dallim. Ato janë adresa e duhur për të gjitha kërkesat dhe nevojat e qytetarëve tanë. Qytetarët pa asnjë dallim, kanë adresë të saktë ku mund t’i marrin shërbimet komunale dhe strukturat paralele e kanë të qartë se nuk mund të operojnë jashtë kornizës ligjore të Kosovës”, tha Krasniqi. Ministri Krasniqi tregoi se institucionet e mbyllura janë Qarku i Mitrovicës së Kosovës, Komuna paralele e Mitrovicës, Komuna paralele e Zveçanit, Komuna paralele e Zubin Potokut dhe Komuna paralele e Leposaviqit.