Policia e Kosovës ka urdhëruar evakuimin e plotë të ndërtesës së Kuvendit, duke përfshirë deputetët, përfaqësuesit e mediave dhe të gjithë të pranishmit, pak para nisjes së vazhdimit të seancës konstituive. Deri tani autoritetet policore nuk kanë dhënë ndonjë sqarim zyrtar mbi arsyet e këtij veprimi, por burime nga Kuvendi sugjerojnë se mund të ketë qenë një kërcënim i mundshëm për sigurinë. Deputeti i Partisë Demokratike të Kosovës, Abelard Tahiri, ka deklaruar se janë udhëzuar të largohen nga godina për shkak të një kërcënimi të supozuar. “Na dhanë udhëzime të dalim nga ndërtesa, sepse ka një kërcënim me gjasë. Nuk e dimë çka po ndodh dhe na kërkuan të dalim. Policia na tha për çështje të sigurisë”, tha ai. Edhe deputetja Vlora Çitaku konfirmoi se sigurimi i Kuvendit u ka kërkuar të largohen menjëherë, pa ofruar shpjegime të hollësishme. “Siç duket ka pasur ndonjë kërcënim për ndonjë sulm apo diçka të ngjashme. Nuk kemi informatë të saktë, vetëm na thanë të largohemi”, tha Çitaku.