Ish-presidenti i Kosovës, Hashim Thaçi është deklaruar i pafajshëm lidhur me akuzat kundër administrimit të drejtësisë, njoftoi më 7 janar Gjykata Speciale në Hagë. Hashim Thaçi ka mohuar akuzat e reja të ngritura nga dhomat speciale të Hagës në procesin që e akuzojnë atë për pengim të zbardhjes së të vërtetës. Ish Presidenti i ka njoftuar këtë qëndrim gjykatëses paraprake me shkrim më 6 janar. Thaçi akuzohet për herë të dytë nga Prokuroria e Specializuar në Hagë për ndikim te dëshmitarët, teksa ndodhet prej vitesh në paraburgim në një proces të tejzgjatur gjyqësor nën akuzat e pretenduara për krime lufte. Më 6 dhjetor 2024, Specialja konfirmoi aktakuzën e re kundër Thaçit, ish-ministrit të Drejtësisë, Hajredin Kuçi, ish-shefit të Agjencisë së Kosovës për Inteligjencë, Bashkim Smakaj, ish-kryetarit të Malishevës, Isni Kilaj dhe ish-pjesëtarit të UÇK-së Fadil Fazliut.