Ministria e Bujqësisë sqaron se aksioni që po ndërmerret në bashkëpunim me administratën tatimore nuk shkon kundër fermerëve, por synon formalizimin e sektorit, gjurmueshmërinë e produkteve ushqimore dhe garantimin e sigurisë ushqimore. “Fermerët nuk janë fajtorë. Ata janë bashkëpunëtorë të rëndësishëm në ndërtimin e një ekonomie të ndershme dhe të sigurtë. Qëllimi ynë nuk është të vendosim gjoba, por të krijojmë një sistem ku çdo hallkë e zinxhirit të prodhimit dhe tregtimit të produkteve bujqësore të jetë e pastër, e kontrollueshme dhe në shërbim të qytetarit.” – deklaron ministria e bujqësisë. Ndër të tjera, në sqarimin publik të ministrisë thuhet se kjo nismë është e rëndësishme për të gjurmuar produktet, të ketë informacion se ku është prodhuar, si është përpunuar dhe kush e ka tregtuar. Gjithashtu ky proces parashikohet të rrisë formalizimin e sektorit, gjë që do të bëjë që fermerët ta kenë më të lehtë akesin në subvencione, kredi, programe zhvillimi apo edhe në eksportimin e produkteve të tyre.