Policia e Shkodrës, në vijim të planit operacional antikanabis të koduar “Koordinata”, ka finalizuar një tjetër rast të kultivimit të bimëve narkotike. Në pranga kanë rënë babë e bir banues në fshatin Drisht, pasi janë identifikuar nga hetimet si autorë të kultivimit të 114 bimëve të dyshuara si kanabis sativa. Bimët narkotike janë zbuluar dhe asgjësuar nga shërbimet e Policisë, më datë 2 korrik 2025. Arrestimi i tyre u bë pas një hetimi të kryer me metoda proaktive, në bashkëpunim të ngushtë me Prokurorinë pranë Gjykatës së Shkallës së Parë të Juridiksionit të Përgjithshëm Shkodër. Dyshohet se të arrestuarit kanë vepruar në bashkëpunim për kultivimin e bimëve narkotike në një zonë të pyllëzuar të fshatit Drisht. Materialet i janë referuar Prokurorisë, ndërsa ndaj tyre rëndon akuza për veprën penale “Kultivimi i bimëve narkotike”, kryer në bashkëpunim. Vijojnë hetimet për të zbuluar persona të tjerë të përfshirë në këtë aktivitet të paligjshëm.