Tomorr Shukulli dhe Valentina Koltraku, të cilët u arrestuan për aksidentin me pasojë vdekjen e një 7-vjeçari, janë liruar nga qelia me masën “arrest shtëpie”. Ndonëse Prokuroria kërkoi “arrest me burg” për Shukullin dhe “arrest shtëpie” për Koltrakun, trupa gjykuese caktoi të njëjtën masë sigurie për të dy. Para gjykatës, Tomorr Shukulli deklaroi se ishte ndalur dhe i kishte dhënë disa para të miturit, por monedhat i kishin rënë në tokë. Sipas tij, ai nuk e ka vënë re momentin kur 7-vjeçari u ul për t’i marrë dhe, sapo semafori u bë jeshil, ka lëvizur mjetin, duke e aksidentuar. Nga ana tjetër, Valentina Koltraku ka pohuar se ndodhej menjëherë pas fuoristradës dhe nuk kishte fushëpamje të qartë për çfarë po ndodhte përpara saj.