Aksidenti tragjik me tre viktima në Kodër Kashar po hetohet nga një grup ekspertësh të Policisë rrugore, ndërsa është marrë në pyetje edhe i vetmi person që mundi të shpëtojë dhe që është drejtuesi i mjetit. Viktima të aksidentit mbetën dy vëllezërit Ismail Sulaj, 66 vjeç, dhe Belul Sulaj, 63 vjeç, kushërinj të shoferit, si dhe Dashamir Dema, 50 vjeç, kushëri i viktimave dhe shoferit. I vetmi që shpëtoi nga aksidenti i rëndë ishte shoferi i mjetit 20-vjeçari Zija Stefanescu, mbiemër që e kishte ndërruar pasi jetonte prej kohësh në Rumani. Ai njihet në dokumentacionin shqiptar me mbiemrin Murati. Ky i fundit ndodhet në spital, pasi mbeti i plagosur rëndë, ndërsa ndaj tij është kërkuar masa e sigurisë “arrest me burg” nga Prokuroria. 20-vjeçari Zija Stefanescu (Murati) është i martuar me një rumune, me të cilën ka dhe një djalë, ndaj dhe ka marrë mbiemrin e saj. Shoferi kishte ardhur në Shqipëri të takonte nënën e tij, sepse do të merrte shtetësinë rumune dhe do të zhvendosej për të jetuar atje. Kushërinjtë e tij e kishin marrë në telefon dhe i kishin kërkuar që të shkonte t’i merrte me makinë. I riu kishte shkuar në lokal, ku kishte qëndruar pak me kushërinjtë dhe më pas ishin kthyer, ku dhe ka ndodhur aksidenti fatal. Makina e aksidentit i përket vjehrrit të të riut, që është shtetas rumun.