Policia e Shtetit u ka bërë thirrje të rinjve që të aplikojnë për t’u bërë pjesë e strukturave të saj, kur mbeten edhe 7 ditë kohë nga mbyllja e aplikimeve për pranimet në akademinë e sigurisë. Në apelin e Policisë së Shtetit theksohet se kjo është një mundësi e mirë për të rinj e të reja, që duan t’i bashkohen sfidës për të luftuar korrupsionin dhe paligjshmërinë në vendin tonë. “Apliko, bëhu pjesë e Policisë së Shtetit, jep kontributin për vendin tënd! Edhe 7 dite nga mbyllja e aplikimeve për oficerë të Policisë Kriminale në Policinë e Shtetit. Aplikimet janë të hapura për studentët e diplomuar në shkencat juridike, ekonomike dhe teknologji informacioni, të cilët duhet të kenë mesataren e notave të nivelit të dytë master mbi 8 dhe të zotërojnë gjuhën angleze. Kjo është një mundësi e mirë për të rinj e të reja, për t’iu bashkuar Policisë së Shtetit në sfidën e fortë për të luftuar korrupsionin dhe paligjshmërinë në të gjitha fushat.