Tetë nga 115 persona të mbetur të lënduar nga tragjedia në Koçan të Maqedonisë së Veriut, të cilët po marrin trajtim jashtë vendit, janë në gjendje kritike për jetën, sipas autoriteteve maqedonase. Sakaq, 55 pacientët që po trajtohen në spitalet e vendit, janë në gjendje të qëndrueshme. Sipas ekspertëve të mbrojtjes nga zjarri dhe fatkeqësitë natyrore, zjarri tragjik në diskotekën e Koçanit është vërtetim se problemi me parandalimin dhe mbrojtjen është i hershëm, dhe sistemi është jofunksional.Sipas autoriteteve, 34 persona janë përgjegjës për tragjedinë e Kocanit, 24 prej të cilëve u është caktuar masa e paraburgimit përfshirë edhe tre krerët e Komunës së Koçanit, kryetari në largim Ljupço Papazov, ish-kryetarët Ratko Dimitrovski e Nikolço Iliev si dhe ish-ministri i Ekonomisë Kreshnik Beksteshi.