Agjencia Kombëtare e Zonave të Mbrojtura është përfshirë në një skandal e shkelje flagrante të ligjit, duke lejuar legalizimin e ndërtimeve pa leje në ato zona që ky institucion duhet t’i mbronte. Gjetjet janë publikuar në një raport të Kontrollit të Lartë të Shtetit i cili vëren se inspektorët e AKZM kanë shkelur ligjet, vendimet e Këshillit të Ministrave dhe rregulloret e brendshme të tyre, duke ngritur dyshimet për afera të mirëfillta korruptive. Në auditim është përfshirë veprimtaria e agjencisë dhe inspektorëve të saj në disa zona të mbrojtura kombëtare. Shkeljet, sipas raportit të KLSH-së janë flagrante, teksa bëhet fjalë për ndërtime në zonat e mbrojtura të Liqenit të Ulzës dhe zonën Korab-Koritnik në Dibër. Sipas KLSH janë identifikuar 67 objekte informale të ndërtuara, për të cilat AKZM ka dhënë dritën jeshile për futjen e tyre në proces legalizimi.