59 vjecari Kujtim Mersini është arrestuar nga policia e Tiranës, nën akuzën e vjedhjes, mashtrimit, dhe shpërdorimit të detyrës. Policia njofton se Mersini, punonjës në një kompani private, gjatë periudhës 3 vjecare të ushtruar në këtë kompani, ka shpërdoruar detyrën duke vjedhur 28 milionë lekë të reja nga të ardhurat e biznesit privat. Sipas njoftimit zyrtar të policisë, 59 vjecari ka ushtruar detyrën si administrator në këtë kompani nga viti 2018 deri në vitin 2021. Vec tij, policia e Tiranës ka proceduar penalisht një tjetër person, që ka ndihmuar 59 vjecarin të kryer vjedhjen e kësaj shume të madhe parash. Kjo e fundit, ishte ekonomiste në këtë kompani, ndërsa policia ka nisur hetimin për të. Hetimi u krye nga Sektori për Krimin Ekonomik dhe Financiar, në bashkëpunim me Prokurorinë e Gjykatës së Shkallës së Parë Tiranë. Materialet hetimore për të dy këta shtetas i kaluan Prokurorisë së Rrethit Gjyqësor Tiranë, për veprime të mëtejshme procedurale.