Moti i acartë ka shkaktuar kaos në të gjithë rajonin e ballkanit, me stuhi bore që kanë shkaktuar mbylljen e autostradave dhe ndalimin e trenave. Dhjetëra mijëra shtëpi në Bosnje dhe Hercegovinë mbetën pa energji elektrike pas borës së madhe që ra dhe erës së fortë që shkaktoi po ashtu kaos në trafik edhe në kroacinë dhe serbinë fqinje. Në Bosnjën perëndimore, është shpallur gjendja e jashtëzakonshme pasi moti i keq bllokoi të gjitha pikat hyrëse dhe dalëse në komunën e Drvarit, duke izoluar 17,000 banorët e saj. “Situata është jashtëzakonisht e vështirë. Bora vazhdon të bjerë. Njerëzit janë bllokuar në dëborë,” tha për mediat një zyrtare lokale. Bora e rënë në disa fshatra përreth Drvarit arriti deri në dy metra lartësi dhe stuhia e madhe i bëri më të vështira përpjekjet për pastrim. “Kërkojmë ndihmë për pastrimin e borës. Të gjitha makineritë në dispozicion janë tashmë në terren”, thanë autorietet. Për shkak të reshjeve të mëdha të borës, mësimi është anuluar në shumë shkolla. Mediat lokale raportuan po ashtu se dhjetëra automjete kishin ngecur në dëborë për 10 orë në Bosnjën perëndimore gjatë natës. Në të gjithë Ballkanin, autoritetet lëshuan paralajmërime për udhëtime pasi bora mbylli disa rrugë kryesore. Bosnja, Serbia dhe Kroacia ndaluan lëvizjen e automjeteve të rënda dhe vendosën nivele të kufizuara trafiku në rrugët e prekura. Në Slloveni, kërkimi për një alpinist hungarez të zhdukur në Alpet në veri të Lubjanës, që nisi të dielën, u pezullua për shkak të erës së fortë. Ekipet e shpëtimit arritën të hënën të shpëtonin shoqëruesen e tij femër. Në Kroacinë qendrore, një ekip shpëtimi malor shpëtoi një burrë që ishte bllokuar në makinën e tij ndërsa po shkonte në spital për dializë.