Gjykata e posacme e apelit per korrupsionin dhe krimin e organizuar ka lënë në fuqi masat e sigurisë për 10 të akuzuarit nga SPAK në bashkinë e Durrësit për abuzim me tenderat. Trupa gjykuese mori vendimin që të lë në burg shtetasit Patriot Beqaraj, Gjergj Markola, Indrit Matmuja, Adriatik Velaj, Muhamed Likaxhiu, Artan Taho, Riza Sulaj dhe Albion Bushi. Ndërsa në burg nga firma private janë lënë Albjon Bushi dhe Riza Sulaj. Ndërkohë, trupa gjykuese vendosi masën e sigurisë arrest në shtëpi për shtetasen Lulzime Rami dhe “detyrim për t’u paraqitur në policinë gjyqësore” për shtetasen Elona Rami. 6 prej të arrestuarve janë zyrtare të kësaj bashkie ndërsa pjesa tjetër janë të kompanisë fituese. Operacioni i SPAK u zhvillua më 29 tetor të këtij viti. Sipas Strukturës së Posaçme Anti Korrupsion që ka ndjekur hetimin, zyrtarët e bashkisë dhe punonjësit e kompanive private kanë manipuluar garën për tenderin me vlerë të fondit limit prej 7.083.000 lekë në periudhën Maj-qershor të vitit 2020. Patriot Beqaraj, ish-Drejtor i Drejtorisë së Burimeve Njerëzore, në cilësinë e anëtar i Komisionit të Vlerësimit të Ofertave dyshohet se ka favorizuar dy kompani për shpalljen e fituesit. Tenderi mban firmën e Emiriana Sakos, e cila aktualisht është kryetare e Bashkisë së Durrësit.