Lumir Abdixhiku i ka mbijetuar votëbesimit që e ka kërkuar në Kuvendin e Lidhjes Demokratike të Kosovës. Abdixhiku i ofroi Kuvendit të partisë dorëheqjen e tij nga pozita e kryetarit, pas rezultatit të shënuar në zgjedhjet e parakohshme parlamentare të 28 dhjetorit. Në këtë proces zgjedhor, LDK-ja fitoi 13.2 për qind të votave – rezultati i dytë më i keq qysh prej pasluftës. Por, disa figura partiake kanë kërkuar dorëheqjen e tij të parevokueshme, duke mos u pajtuar me votëbesim. Në mesin e tyre është Hykmete Bajrami, e cila ka dhënë dorëheqje të parevokueshme nga pozita e nënkryetares së partisë dhe e ka kërkuar të njëjtën edhe nga Abdixhiku. ‘Njeriu nuk matet kur gjithçka shkon mirë, por kur duhet të flasë edhe atëherë kur fjala i dridhet”, ka thënë Abdixhiku gjatë fjalimit të mbajtur të shtunën para Kuvendit partiak. Megjithatë, edhe ky votëbesim nuk e zgjidh ngërçin brenda LDK, pasi shumë prej anëtarëve kërkojnë prej Abdixhikut dorëheqje të parevokueshme dhe zgjedhje të reja për kreun e Partisë. Disa prej tyre e konsideruan votëbesimin një manovër për të shmagur garën dhe përgjegjësitë për humbjen në zgjedhje.