Kryedemokrati Sali Berisha në konferencën e kësaj të marte me gazetarët, shprehu ngushëllimet për vrasjen në krye të detyrës të gjyqtarit Astrit Kalaja, teksa përsëriti akuzat ndaj qeverisë. Sipas Berishës, ngjarja e të hënës është dëshmi e dështimit të sistemit të drejtësisë. Ish-kryeministri e cilësoi vrasjen e gjyqtarit si një krim shtetëror, nisur nga fakti se sipas tij ngjarja ndodhi në mungesë të plotë të të gjitha përgjegjësive dhe detyrimeve shtetërore, qoftë edhe atyre më minimale për mbrojtjen e jetës dhe veprimtarisë së zyrtarëve të shtetit brenda institucioneve të tyre. Nga ana tjetër Berisha shtoi se Rama po përpiqet të shfrytësojë këtë ngjarje, për të miratuar ndryshimet në Kodin Penal.