Zgjedhjet e pjesshme lokale nuk dihen kur do të mbahen, por sipas presidentit Meta, ai ka të drejtën e marrjes së informacionit, gjë e cila ka ndodhur tashmë për të gjitha bashkitë e vendit të mbetura pa kryetar. Por, ajo që vlen të diskutohet ka të bëjë me partitë politike, që do hyjnë në këto zgjedhje. Cila është më e avantazhuar dhe a është ky një test për maxhorancën dhe vetë opozitën? Opozita është në momentin e saj më të vështirë mes tensionesh e debatesh të forta. Partia Demokratike, e cila duke mos marrë pjesë në zgjedhjet lokale të 2019-ës i dhuroi socialistëve të gjithë pushtetin lokal, tashmë ndodhet në dilemën e madhe të pjesëmarrjes në zgjedhjet e pjessshme, një akt i cili legjitimon zgjedhjet e 2019, për të cilat aso kohe u thanë se ishin të pavlefshme, pas një dekreti shumë të diskutuar të presidentit Ilir Meta.