Ish-presidenti Donald Trump reagoi ashpër të mërkurën pas kontrollit të FBI në rezidencën e tij Mar-a-Lago në Florida, e cila zgjati për më shumë se 9 orë. Ish-presidenti tha se ishte viktimë e një gjuetie politike shtrigash nga demokratët dhe e cilësoi bastisjen si të motivuar politikisht. "Duke parë fitoret e mëdha të kandidatëve që kam mbështetur dhe kryesimin tim në të gjitha sondazhet, ata po përpiqen të frenojnë edhe një herë Partinë Republikane dhe mua. Kjo që ka ndodhur është e tmerrshme dhe e ngjashme me vendet e botës së tretë, në një republikë bananesh. Kjo është më keq se vijimi i hetimeve për lidhjet me Rusinë, impeachment 1 dhe 2 apo raporti Muller”, tha ish presidenti. Kontrolli në shtëpinë e ish kreut të Shtëpisë së Bardhë është pjesë e një hetimi se ai ka mbajtur dokumenta zyrtare në vend që t'i dorëzonte në Arkivin Kombëtar, kur la detyrën.