Tetë persona janë arrestuar me urdhër të Prokurorisë së Durrësit për arratisjen e Altin Ndocit, që ndodhi ditën e martë gjatë shoqërimit të tij për në spital. Masat e sigurisë të caktuara nga prokuroria janë ekzekutuar nga shërbimi i kontrollit të brendshëm i burgjeve. Të arrestuarit janë gjashtë efektivë të policisë së burgut të Durrësit, zv.shefi i policisë në këtë burg dhe kryeinfermieri i spitalit të burgut. Altin Ndoci, i burgosuri i rrezikshëm që po gjykohej për masakrën e Bradasheshit në Elbasan është zhdukur pa gjurmë. Autoritetet nuk kanë asnjë të dhënë mbi vendndodhjen e mundshme të tij, teksa hetimet janë shtrirë si administrative, ashtu edhe penale. Burime të Top Neës pohojnë se po hetohen disa elementë që ngrenë dyshimet për një arratisje të mirëmenduar, ku dyshohet se mund të ketë bashkëpunëtorë edhe nga radhët e policisë së burgjeve, apo stafit mjekësor të burgjeve. Hetimet kanë nisur nga fakti se pamjet e fiksuara nga kamerat e sigurisë tregojnë se Altin Ndoci është shoqëruar me ambulancë për në spitalin e Durrësit i paprangosur. Ai ka shfrytëzuar një moment pakujdesie nga grupi i shoqërimit dhe pasi është përplasur me efektivët e burgjeve ka arritur që të largohet me shpejtësi me vrap.