Premtimi i kryeministrit Edi Rama për të integruar inteligjencën artificiale në procedurat e prokurorimeve publike, pritet të realizohet falë një borxhi që qeveria shqiptare do të marrë tek Banka Ndërkombëtare për Rindërtim dhe Zhvillim, që kap shifrën e 76 milion e 900 mijë eurove. Maturimi i huasë është 18 vjet, duke përfshirë perudhën pesë vjeçare pa pagesë principali. Në draftin që ka kaluar për shqyrtim në Kuvendin e Shqipërisë, thuhet se “ Do të ngrihet një sistem prokurimi me inteligjencë artificiale, që u përgjigjet nevojave të institucioneve dhe bizneseve në mënyrë më efektive, me qëllim rritjen e pjesëmarrjes në proceset e prokurimit, kursimin e kohës dhe uljen e kostove financiare për përgatitjen dhe vlerësimin e dokumentacionit, si dhe garantimin e një gare të drejtë ndërmjet operatorëve ekonomikë në tender.” Ky projekt do të zbatohet nga Agjencia Kombëtare e Shoqërisë së Informacionit deri në maj të vitit 2029. Do të përdoret instrumenti “Program for results”, me vendosjen e treguesve të performancës për çdo fushë.