Qeveria shqiptare parashikon që të emëtojë brenda tre muajve të parë të vitit të ardhshëm kërkesën për financim me të paktën 600 milionë euro përmes një eurobondi. Ministria e Financave thotë se pas konsultimit me partnerët dhe ekspertët ndërkombëtarë ka vlerësuar se kjo periudhë është më e favorshme në tregjet e huaja për të përfituar norma interesi të favorshme për borxhin e ri. Nëse do të realizohet, ky do të jetë eurobondi i shtatë i Shqipërisë që nga viti 2015. I fundit u mor në vitin 2023 në shifrën e 600 milionë eurove dhe me një kupon vjetor interesi prej 5.9 për qind. Eurobondi i 2025 do të përdoret pjesërisht për shlyerjen e borxhit të marrë përmes eurobondit të vitit 2018, që maturohet në tetor të vitit të ardhshëm. Shuma që do të shkojë për pagesën e këtij borxhi është llogaritur në rreth 367 milionë euro.