Grupi hetimor i policisë dhe prokurorisë është rikthyer mëngjesin e së enjtes në vendin e ekzekutimit të Hamza Licit dhe Arlind Bushatit për të rikëqyrur vendngjarjen dhe për të rindërtuar të gjithë skemën e atentatit. Mbi 50 gezhoja janë gjetur në një distancë prej rreth 150 metër. Dyshohet se kanë qënë 3 autorë, njeri drejtues i automjetit Range Rover dhe dy të tjerë të cilet kanë qëlluar. Në objektiv të atentatit dyshohet se ka qenë Hamza Lici, djali i Mustafë Licit, i cili ka marrë disa plumba në trup, ndërsa Arlind Bushati ka marrë vetëm një plumb në kokë, që fatkeqësisht rezultoi fatal për të. Pasi kanë kryer krimin, autorët janë larguar në drejtim të fshatit Golem, ku kanë djegur makinën në një rrugicë me shumë banesa. Grupi hetimor po kontrollon edhe kamerat e sigurisë, por ende nuk ka asnjë person të identifikuar.