Në një operacion të SPAK kundër trafikimit të kanabisit në disa qytete të vendit, policia ka arrestuar me dhjetëra persona të dyshuar. Në total, mësohet se SPAK ka lëshuar 44 urdhërarreste, prej të cilave 42 janë arrest me burg, një detyrim paraqitje dhe për një shtetas tjetër është caktuar arresti në shtëpi. Në mesin e të arrestuarve mësohet se janë edhe dy punonjës policie. Ata janë Fejzo Muçaj me detyrë punonjës policie në Komisariatin e Tepelenës dhe Adriatik Logli, punonjës i policisë në Drejtorinë e Gjirokastrës. Në një njoftim zyrtar, SPAK bën me dije se hetimet për këtë operacion zgjatën për një periudhë 3 vjeçare. Bëhet fjalë për 5 grupe kriminale të cilët kanë bashkëpunuar me njëri tjetrin në kultivimin dhe trafikimin e hashashit, por edhe të kokainës në sasi të vogla. Në 12 raste janë sekuestruar sasi të ndryshme droge, rreth 500 kg në total. Hetimet për këtë grup mësohet se nisën në vitin 2019. Ata akuzohen për kultivim kanabisi në Vlorë, Tepelenë, Durrës, Tiranë, Lezhë dhe një rast kalimi në Maqedoni.