Qeveria gjermane ka hapur rrugën për dorëzimin e 40 avionëve luftarakë Eurofighter Typhoon në Turqi pas një vendimi pozitiv nga këshilli federal i sigurisë, raportoi revista Spiegel të mërkurën.Turqia ka qenë në bisedime për blerjen e avionëve luftarakë Eurofighter Typhoon, të cilët janë ndërtuar nga një konsorcium i Gjermanisë, Britanisë, Italisë dhe Spanjës, të përfaqësuar nga kompanitë Airbus, BAE Systems dhe Leonardo.Këshilli federal i sigurisë i Gjermanisë, miratimi i të cilit kërkohet për eksportet e armëve, vepron pas dyerve të mbyllura dhe qeveria në përgjithësi nuk komenton vendimet e tij. Ministria gjermane e mbrojtjes refuzoi të komentonte raportin. Më herët këtë javë, Presidenti turk Tayyip Erdogan tha se Gjermania dhe Britania kishin një qëndrim pozitiv për shitjen e avionëve luftarakë, duke shtuar se Ankaraja dëshironte ta finalizonte blerjen sa më shpejt të ishte e mundur. Turqia u dëbua vite më parë nga projekti i F-35ave, pasi bleu sistemin rus të mbrojtjes ajrore, S-300 që sipas zyrtarëve amerikanë binte ndesh me sistemet e nato-s. Për vite të tëra po ashtu ajo ka tentuar të blejë avionët luftarakë amerikanë F-16, por deri më tani nuk ka asnjë rezultat konkret. E në përpjekje për të rinovuar flotën e saj ajrore, Ankaraja po zhvillon tani edhe avionin e saj të gjeneratës së pestë, KAAN, i cili ka kaluar me sukses testimet e para.